حكاية مدينة دمشق 3

الشام بالليل بتحكي كتير شبابيك مليانة قصص غضب وحب حزن واسى وكتير كتير من الحب، في هيدا الشب اللي كان صوت الموسيقا عندو واصل لتحت عالشوارع وصوت ام كلثوم عم يصدح أغداً القاك وفي هيدا الرجال الكبير بالعمر طل الشباك وعم يعيط ويقول طفي الموسيقا ولك عمو بدنا ننام ام كلثوم مابتتفوت بس والله بكرا عنا دوام والشب بعالم تاني مو سامع ولا كلمة غير صوت قلبو عم ينده حبيبتو الغربة هاك الصبية اللي عم تتأمل من البرندة مدري شو اللي خلاها شاردة كل هالقد لدرجة ما انتبهت لصوت القصف اللي مو بعيد عنن كتير رجت الدني وهيي قلبها عم يرج حب ولهفة واحلام /أحلامي رح تتحقق ياترى /هيك عم تدعي للرب أو انا هيك حسيت الرومانسية المفرطة كانت ولازالت وصمة عار ومزح واستهزاء بين الناس بالليل كل حدا بيلجأ لشباكو بيبكي الحب والطموح و الغربة وقسوة الحياة والصبح اول ماينزل على جامعتو بينقلب وبيصير يطبل لجماعة الاستهزاء كيف هاد التناقض كيف قادرين!! كل هالقد المشاعر بتخجل كل هالقد الحب حاجة ملحة ومخجلة بنفس التوقيت ولسا ام كلثوم عم يعلا صوتا / هذه الدنيا كتاب انت فيه الفكر هده الدنيا ليال انت فيها العمر / رجال كبير بالعمر مو قادر ينام من همو وهم الدني والغلا والعيلة وعم يتحجج بأم كلثوم والصوت العالي انو مو قادرين يخلوه ينام... تنين عشاق نسيو وين هني نسيو الناس وفقدو احساسن بالوقت وماشيين عالمجهول، ماشيين بحب ولهفة احلام مكسرة وبعيدة بس بعيون الحب كل شي بينرسم بسلاسة الكمامات عم تنرمى من الشبابيك بالليل اعتراضاً على فيروس حكمنا وماعرفنا نسيطر عليه هوي والموت سيطرو علينا الصبح بتنزل بتشتري كمامة تانية وتالتة وبتنصاع لواقع انت فيه مجبور تعيش تنين رفقات واحد منن عم يبكي بحسرة وقهر مستحيل تشوفو وماتنقهر معو الليل غطا دموعو وكتف رفيقو سندو عم يبكي حياة مو قادر يأمن حالو فيها ويتزوج البنت اللي وعدها بكنوز الدني الأمل نعمة كبيرة من الله بس يا الله إذا سمعان مناجاة الليل!! دخلك لسا فيه أمل! المقطع الموسيقي المرافق : نطرونا كتير كتير عموقف دارينا